Zebur 146

146-njy mezmur

1 Rebbe şan-şöhrat bolsun!

Çünki Hudaýymyzy nagma bilen öwmek ýagşydyr,

lezzetlidir, Ol öwgülere laýykdyr.

2 Reb Iýerusalimi bina eýleýär,

Ysraýylyň pytranlaryny jemleýär.

3 Göwni synyklara Ol şypa berýär,

olaryň ýaralaryny daňýar.

4 Ýyldyzlaryň sanyny Ol hasaplaýar,

olaryň ählisini Ol atlandyrýar.

5 Rebbimiz beýikdir, kuwwaty köpdür,

paýhasynyň hiç çägi ýokdur.

6 Reb pespälleri galdyrýar,

Ol erbetleri ýere pylçaýar.

7 Rebbe şükür nagmalaryny aýdyň,

Hudaýymyza lirada mukamlar çalyň!

8 Ol gökleri bulutlara büreýär,

toprak üçin ýagyşlary taýynlap goýýar,

baýyrlarda gök otlary gögerdýär.

9 Ol haýwanlara,

jüýgüldeşýän garga çagalaryna

olaryň ryskyny berýär.

10 Ol ne bedewiň güýjünden wagtyhoş bolýar,

ne-de urşujynyň aýagyndan keýpi çag bolýar.

11 Reb Özünden gorkýanlardan,

Onuň sadyk söýgüsine umyt baglaýanlardan,

keýpi çag bolýar.